قصيدة حول المحبة

لمحبة

بين قلب وقلب
ميات سباب
يفتح ليها الباب
ولى جات بلا سبة
راها لمحبة
فتحو السراجم
وزيدوا لبواب

ولى الشوق ازداد
على بيها وزاد
محبة ربي الفوق
تعدات كل محبة
وللي حبو مولاه
عمرو ما ينساه
لابد يوم يذوق

بين ذات وذات
إلى تقدر ودخلات
حبة على حبة
كبرات لمحبة
قد القبة صبحات
الولف فيها يتخبا
الروح تميل للروح
عين ما تنوح
والقلب على محبتو يتربى

لمحبة ثوب
من الصوف منسوجة
إلى تلبسها لقلوب
خير ما لبسات
تدفي وقت البرد
وتبرد حر لوقات

لمحبة فيها وفيها
الاولى بالجملة
ما ترشى ولا تبلى
تزداد من لرحام
وتكبر بين لخوت
ما تغيرها ليام
ولا يمحيها غدر لموت

والثانية أنواع
ما تشرى ما تنباع
بين هذا وذاك
ما فيها طمعية
ناس تاخذ بزاف
وتعطي غير شوية
لمحبة بلكَرام
عندها معطية

لمحبة الصافية بحور
الدوام يحليها
لمحبة الصادقة بخور
مسك وعنبر وعود
ريحتها غالية
بيها يتعطر لوجود

ماشي شم ولم
وخايف لا لعطر يتم
ولى طماع يطمع فيها
شي محبتو بشروط
من غير العربون
واجد محطوط
والله واحد ما يديها

لمحبة وردة
لازم باش تعيش
كل يوم تسقيها
وللي قلبو ما صافيش
راها تذبال
وتحير البال
وريحتها ما تعطيش

لمحبة دوا لقلوب
يا للي قلبو معطوب
وما يبغيش
لمحبة كنز كثير
علينا تفرق الخير
بغيني و ما تعطينيش

جنان لمحبة عامر
دخل وشوف بعينيك
مانابت فيه شوك
ولا فيه مسامر
غير تحط رجليك
والزهر من السما يتقاطر

» المحبة
» خــــــــــــــــــــــــــلطة المحبة
» حيوط المحبة
» ورود المحبة
» المحبة في الله