بغيت نسامح
بغيت نسامح
غادي ننسى لجراح
ونكَول ما كاين باس
نسامح كل الناس
للي عايش وللي راح
غادي نسامحك نت
ونت ونت ونتي
نخللي لحزان فراح
يصبحو عدياني خوتي
كَالو فالصلح الخير
غادي نزرع لكثير
ونفرش خدي حرير
فكل مسا وصباح
عطر لمحبة فاح
ما بقى كَلبي يقسى
بغيت صافي ننسى
نطوي الصفحة ونرتاح
غدا يوم جديد
كأنو نهار العيد
نغمض عيني ونصحا
يروح أثر الجرحة
بغيت نكَول للناس
مريضنا ما عندو باس
الكَلب القاسي رطاب
ومعاه رطاب الإحساس
أنا ما ناسيش الملحة
وبغيت الغمة تنزاح
فوق النخلة حلات البلحة
ولعسل من الشهدة ساح
ليوم فكَلبي فرحة
جرحي لقديم برا
وطفات ديك الجمرة
ونسيت سباب القرحة
غادي ننسى لجراح
ونكَول ما كاين باس
نسامح كل الناس
للي عايش وللي راح
عينيك
عينيك يا ولفي كتاب
من عنوانو نقراه
من نظرة قريت حروفو
وعرفت السر للي وراه
عينيك يا ولفي بحر
ساكن وفيه سرار
وحدي أنا نقدر
فاعماقو نوللي بحار
بشوفة مخطوفة
من داك البر
عرفت علاش
ذبالو لشفار
تيه يا ولفي تيه
نت واتاك التيه
ما زال الليل مغطي لفجر
ما زال على عيونك ستار
عللي بجناحك وطير
واللايم لا تسال عليه
هداك لهوا خليه
زارك بلا شوار
يا ولفي راك نت أنا
غرامك لا تخاف عليه
خديتو عندي أمانة
فكَلبي ما زال مخبيه
عينيك يا ولفي سلام
وسلامك بالغالي نشريه
بنظرة ومن غير كلام
حتى عمري راني نهديه
الأحد 13 يونيو 2021, 15:01 من طرف 
موضوع: قصيدة بعنوان بغيت نسامح 
