الحلم الضايع

الحلم الضايع

ليام أليام
شحال ضيعت من احلام
وانا صغير
خيط من لحرير
لفياق بكري
مثل الطير
فكل صباح
وصهد لرياح
ما نبالي
حلمي كان غالي
حلمي كان غالي نكبر و نقرا
مثل قراني
مسيرة طويلة
حر وقر وليالي حياني
الجوع ولحفا
لفقر عراني
قلت المحنة تفوت
فالصبر عضيت بسناني
حملي كناش وقلم
كتاب ومعاني
العلم والحكمة
لفقيه قراني
شفت النور
تفتح بالي
فرحت لميمة
زغرتات بصوت عالي
وقالت :
سعدي فرحي
يا سعدي ويا فرحي
شكون بحالي؟
ولدي نجح
قرا وفلح
وارتاح بالي

* * *
لكن
دازت ليام
يوم على يوم
شهور وسنين طوال
دازت ليام
ايام على ايام
لا خدمة لا ردمة
صرت نعاني
صرت غريب بلا غربة
فبلادي صرت براني
مكواني يا مكواني
آه شحال من آه
وشحال من حياني
آه لوكان تعرف
شحال جريت
شحال دريت
شحال من باب دقيت
وشحال قطعت من طرقان
جريت
دقيت
وعاود دقيت
لا من اسمع دقاني
مكواني يا مكواني

* * *
زاد همي
هم على هم كترت لمحاني
فكل عشية وصباح
غارق فلهموم
النوم جفاني
لعقل صار مخبل كبة
الدات عليلة
لا بال مرتاح
لا ضمير هاني
تخبلت ليام
صار الزمان حربة من سيف
الشتا رجع صيف
والربيع صار خريف
ليام ظلمات
عديتها بالسوايع
والدقايق
والثواني
صرت معيوف
مركن وملفوف
صريرة مصرورة
حلاسة مهجورة
في ركنة الركان
عايش منسي
مرمي عالحافة
مضرع بالرجا
صابر و نعاني
مكواني يا مكواني

* * *
مكواني يامكواني
قاسيت لهموم
عانيت لمحاني
جرعت لمرار
النوم جفاني
ميمتي حياني
وا ميمتي حياني

* * *
مكواني يا مكواني
قاسيت
جريت
عانيت
صبري تحدا لحدود
بدلت مجهود
غايتي نوصل
مرادي نبلغ المقصود
لكن سوق الخدمة
مبلع ومسدود
بابو حديد مسلسل
مغلل ومرصود
مطرق بلعاني
قفلو زكروم
مفتاحو مفقود
ما يدخلو غير هداك
ولا هديك
ولا ولد فلان الفولاني
ولا شي محضوض جيبو مليان
يعطي لهدا
يعطي لداك
بالعلالي
حاجتو مقضية
فالصباح قبل لعشية
ما يتسنا
ما يشد صف بحالي
وانا المزلوط اللي جيبو خالي
بقيت عالحافة مشطون البال
لا من يشفق
لا من يرفق بحالي
مكواني يا مكواني

* * *
حرت
خممت وغرقت فتخمامي
وقلت اللي ليها ليها
شي حرﯕﺔ رغم الموج العالي
فلتة ولا موتة
ولا عيشة السفالي
وهاكدا صار حالي ما هو حالي
رجايا بالليل والنهار
عييت ننفض لغبار
حتى صار اللي صار
صارت حكايتي قصيدة
يرويها الجار للجار
صارت حكايتي قصيدة
معلقة فقواس كل دار
صار اللي صار
وانا على هاد الحال تايه ومحتار
حتى جا واحد مكار
ضنيتو شفاه حالي
مشيت وراه بالهجرة غراني
سلمتو كل ما طلب
بالخدمة مناني
ديب لغشا قضا حاجتو
زاد وخلاني
مكواني يا مكواني

* * *
لهفني لهفة
زاد خلفة
عطا بلدبار
كفا ما بقا لو أثار
خبط رجلو زاد ونساني
داك المكار
طبيعتو غدار
فالشمس الطالعة وعز النهار
مكواني يا مكواني

* * *
مكواني راه غراني
مكواني راه عراني
بلهيبو زاد كواني
بلا فاس حفر لي حفرة
ردمني
هدمني ورزمني
نساني
نكرني نكران
قلب وجهو
صار قلبو نصراني
مكواني يا مكواني

* * *
حرت
زاد همي
فار دمي
عليت صوتي
صحت بلجهار
وا ميمتي لميمة
موج الواد داني
غول محمي
فيضو طوفاني
الصولة والجولة
يستاحق تهاني
بلهدب منبت
ما يشوف محاني
غطاه حرير
فراشو زيواني
الى دارها غزا
بصحتو
براحتو
يستاهل ثمر وحناني
وانا
ماشي غير انا
بقيت فالهم نعاني
العطالة
الشوماج والبطالة
مكواني يا مكواني