يا عجبي

يا عجبي
العجب تعجب من عجبي
ما بقا ما تنصح
ما بقا ما تربي
أكندير
كندير مع صبري
للي اقلال صبرو
كندير أبنادم ساكت معانق قهرو
كي فايق كي ناغس
طالق شرار شرو
الى زاد الحال عالحال
وشطحت الغربان على قبرو
راه ما يدوم حال
اكون يدوم ربي بخبرو
ما زال يصفى الحال
والضبابة تتلاشى
ويرجع الغريب لبلادو
وصغارنا يكبرو
وللي قلال جهدو
ناخذو بيديه
وللخواطر نجبرو
وللي تقهر وتدبر اطاح
نوقفوه ونصبرو
ولا تهدم سور الدار
على سواعدنا نشمرو
ولا جف حوضنا أذبال
بعرقنا نرويوه
حتى يتفتح زهرو
يا عجبي ما بغينا غنة
ما بغينا دنة
ما بغينا كلمة احلم وتسنى
بغينا حب وامحنة
صافية على طول دوام
بالسلام ..واصفا تتغنى