ملّي كنت فوق الجبل
قـَسْت بيدي السّحابة
خطفت من غَمْها شوية
حركت دراعي ظنيتهم جْنحين
قـلت مع راسي يمكن نطير ..
واخا الجبل صْـليب
وحْجارُو مَرْصيّة
واقف بثباتة ورْزانة
ما تقول غير وزير ،
ولا حاجب مُولاي ،
**
فلما تَجَلَّى رَبُّهُ لِلْجَبَلِ جَعَلَهُ دكا
**
بقيت تابع خيالي شاد فيه
وشاد حتى هو فيَ
علاش ؟؟..
يمكن رهبة السْما
و هْبوب النسْما
ولا يمكن كنت خايف
عالي ،..
وكلشي صْغير
ملي تْسيحْ بْشوفكْ
الدار والبير
وقصدير البيت الخالي
شفت حد جناحي
وقلدت تفرفيرة الطير
حسدت النسر
حتى لا طار عليه السر
ويلا طرتي يا خيالي
يقولو مالو هتر
**
التوين سانتر بكازا
و لا غيركن بلـْمَاريكانْ
كل زواق يفنى
وصباغتو تطيرْ
و شكون شافك يا لمْكحّـل بالليل
را الطالع ما يوصل للعلو
غير يلا ما خواو ركابو
حرّك جنحيك وانت بلرض
وْلا تفرعن ملـّي يطوال عُودك
**
مولاي الجبل ما يتكبر
راضي بيَ وخيالي من فوقو
نايض فيه لعرعار والشوك
سايح فيه لرنب والحّلوف
بازق عليه بوعميرة
و شوف التواضع
…
وانا فوق الجبل
هسهس زماني
همي فاق من نعاسو
و خاطري ضاق
قلت مع راسي
واش فيها يْلا حتى انا
ياك شحال وانا صابر
درويش بن درويش
ولد درويشة
ما بفمي عاشق دهب
ولا على راسي ريشة
شي نهار زعما
حتى انا نكون
إيه.. نْـكون ، علاش لا ؟
بغيت نكون واخا غير مع خيالي
نكون حاجة
ولا غير بنادم
ماشي ديما مهزوز
يا هازني الجبل
يا هازني شي حد ثاني
بحال لمشنوق بحبل
مشفّي فيَ زماني
نعيش ونحيا ،
بلحق ماشي العيشة هادي
اللحية ما تهز اللحية
خايف يجي النهار اللي يلوموني ولادي
حيث فهاد الزمان
انت تختار
يا تكون جبل
يا تكون زبل
الأحد 13 يونيو 2021, 15:01 من طرف 
موضوع: ملّي كنت فوق الجبل 
